Sámi pedagogalaš prinsihpaid vuođul (searvelatnja) dáhpáhuvvá oahppan arenain gos rávisolbmot, vuorrasat, nuorat ja mánát deaivvadit ja barget iešguđetge bargguid ja doaimmaid ovttas. Dát addá vejolašvuođa bargat fágaidrasttildeaddji oahppamiin, mii lea oassin oahppoplánas.
Oahpahusláhka deattuha ahte oahppit galget oažžut historjjálaš ja kultuvrralaš ipmárdusa ja čanasteami. Oahpahus galgá ovttasbargguin ruovttuin ráhpat uvssaid máilbmái ja boahtteáigái. Skuvla galgá ovttasráđiid ruovttuin buoremus lágiin láhčit oahpahusa oahppái. Maiddái ohppiin geain lea sámegiella nubbingiellan lea riekti oažžut oahpahusas sámegielat birrasiin, go dat lea dárbbašlaš vai oahpahus lea pedagogalaččat dohkálaš.
Sámi parlamentáralaš ráđis čilgejit ahte sámi árvvut mat leat čatnasan luonddufilosofiijai, gillii, kultuvrii, jođiheapmái ja árbevieruide galget leat vuođđun pedagogalaš barggus. Sáhtát eanet lohkat Sámedikki siiddus.
Movt bargat páhkain:
Sámi guovlluin leat hui iešguđetge gielladilit. Páhkat galget adnot skuvllain gos leat sámegielat oahppit, sihke oahppit geain lea sámegiella eatnigiellan ja sámi oahppit geain lea dárogiella eatnigiellan. Skuvlla eaiggádat, jođiheaddjit ja oahpaheaddjit fertejit iskat ja guorahallat makkár oasit dán páhkas heivejit buoremusat sin váhnenjovkui. Dan lea dárbbašlaš dahkat dan dihtego sámis leat nu iešguđet lágan dilit ja vuolggasajit sámegielmáhtus. Páhka vuosttaš oasit leat skuvlla váste. Maŋemus oasis gávnnat resurssaid maid sáhttibehtet geavahit go ovttasbargabehtet ruovttuin ja sámi lagasbirrasiin. Dii oažžubehtet heivehit resurssaid ja ovdánahttit daid nu ahte heivejit din váhnenjovkui ja dárbbuide. Dán páhkas mii geavahit doahpaga váhnemat, sihke váhnemiidda ja ovddasteddjiide.
Gáldut
SáMOS-prošeakta: Unna olbmožiid árgabeaivi mánáidgárddiin. Pedagogalaš prinsihppat sámi mánáidgárddiide. Sámediggi.
https://sametinget.no/_f/p1/idd40af87-a136-4b13-89d3-f40aada836a1/felles-verdigrunnlag-og-overordnende-prinsipper-for-barnehagetilbudet-og-for-opplaringen-i-hele-sapmi.pdf