Ovttaslohkan

Ovttaslohkan, dahje shared reading, bargovuohki lea dutkojuvvon Englánddas, go Jane Davis oahpahii rávisolbmuide eŋgelasgiela. Dál leat olbmot iešguđetge surggiin ja virggiin bargan dán bargovuogi vuođul ja leat ožžon buriid bohtosiid iežaset lohkanprošeavttain. Dát dutkamat leat čájehan ahte ovttaslohkanvugiin sáhttá buoridit oktavuođaid, nannet iešdovddu, buoridit kognišuvnna, arvvosmahttit psyhkalaš áhtanuššama ja váikkuhit oktavuođaid dan joavkkus mas čađahuvvo ovttaslohkan.  

Image

Ovttaslohkan sulastahttá jitnositlohkama, muhto jus háliida čađahit ovttaslohkama nu movt lea álgoálggus hábmejuvvon, de galgá leat lohkanjođiheaddji guhte lea čađahan dohkálaš ovttaslohkankurssa. Mii sáhttit aŋkke ávkkástallat bohtosiiguin mat bohtet ovdan shared reading bargovuogis ja oahppat dain movt sáhttá čađahit jitnositlohkamiid luohkkálanjas.  

Ovttaslohkanmetodas leat vihtta prinsihpa: 

1. Dušše lohkanjođiheaddji dovdá ovdalaččas teavstta maid galget lohkat. Guldaleddjiide, dahje oasseváldiide lea dá amas teaksta.
2. Válljejuvvon teavsttas galgá leat buorre kvalitehta ja galgá sáhttit leat vuolggasadjin buriid ságastallamiidda.
3. Son guhte lohká jitnosit, galgá njozet lohkat, vai guldaleaddjit fáhtejit lohkamuša sisdoalu. Guldaleaddjit galget beassat lohkat fárus, dahje dušše guldalit.
4. Go ságastallá lohkamuša birra, de galgá láhčit nu ahte buohkat besset searvat ságastallamii. Lohkanjođiheaddji galggašii oažžut oasseváldiid nu oadjebassan ahte dustet muitalit iežaset jurdagiid ja oaiviliid teavstta birra, dahje mat čuožžilit teavstta dihte.
5. Oasseváldit galget dovdat iežaset oadjebassan ja fátmmastuvvon. Ii galgga gáibidit ahte oasseváldit servet ságastallamiidda, ja buot oaivilat mat bohtet ovdan galget oažžut buori fuomášumi.  

Ovttaslohkan ii leat ođđa bargovuohki, muhto go lea nu dárkilit čađahuvvon de lea álkit dutkat dan. Dat lea dahkkon veahá dutkan ovttaslohkama birra skuvlakonteavsttas. Dát dutkamat čájehit ahte dat sosiála bealit lohkamis, gos ságastallan lea dehálaš oassi, nanne ohppiidjoavkku oktavuođaid, dahká ahte oahppit buorebut máhttet guldalit nubbi nuppi oainnuid ja buorebut máhttet ipmirdit ja molsut iešguđetge perspektiivvaid gaskka.  

Loga eanet:  
https://www.thereader.org.uk/shared-reading-wwd/children-and-young-people-who-we-read-with/  

https://foreningenles.no/mer-samlesing-inn-i-skolen