Girjeválljen go galgá jitnosit dahje ovttas lohkat
Jitnosit- ja ovttaslohkama bokte besset oahppit oahpásnuvvat dan viiddis girjjálašvuođamáilbmái mii gávdno. Muhto, jus dát galgá ollašuvvat de fertejit girjjit leat olámuttos. Dá leat moadde evttohusa movt sáhttá girjjiid válljet:
- Ráhkat unna girjerádjosa luohkálátnji
Sáhtát válljet muhtin girjjiid maid bijat gássii maid nammadehpet girjegássan. Dahje sáhtát ovdamearka dihte lásegárbmii dahje eará vuogas sadjái luohkálánjás ráhkadastet smávva girjerádjosa. Ávžžuhuvvo válljet girjjiid main leat iešguđet fáttat ja iešguđet šáŋŋer. Ávžžuhuvvo maid válljet sihke girjjiid maid lea álki lohkat ja girjjiid maid lea veahá váddáset lohkat.
- Ovttas oahpásnuvvat girjjiide
Go lehpet lohkan ovtta girjji jitnosit luohkás, de sáhttibehtet árvvoštallat leigo dá girji masa liikobehtet vai ii. Dainna vugiin beasat kártet makkár girjjiide oahppit liikojit, ja nu sáhttá šaddat álkit válljet girjjiid main leat fáttát dahje šáŋŋerat masa dát ohppiidjoavku liiko. Jus dáhpáhuvvá nu ahte leat lohkamin girjji masa oahppit eai oro liikomin, de it dárbbaš lohkat olles girjji. De báhca loahppa dego teaserin mii sáhttá fillet soames ohppiid ieža lohkat girjji loahpa.
- Ovttasbargga eará oahpaheddjiiguin
Sáhtát evttohit ahte din skuvlla oahpaheaddjit ovttasbargabehtet girjeválljemiin. Jus ovttasbargabehtet de sáhttibehtet juogadit iežadet girjeárvalusaid, árvvoštallamiid ja girjetipssaid. Sáhttá de dáhpáhuvvat nu ahte dii ovttas gávdnabehtet buriid ja geasuheaddji girjjiid.
- Fina girjerádjosis
Jus it ieš oro gávdnamin girjji, dahje jus háliidat oažžut buriid rávvagiid, de sáhtát fitnat girjerádjosis. Girjerájusbargit dávjá dihtet daid ođđaseamos mánáidgirjjiid birra ja dihtet makkár girjjit leat hui áigeguovdilat ja beakkánat juste dál. Sáhtát maid iskkat girjegávppiin dahje ovttas.no makkár girjjit gávdnojit ja oanehaččat lohkat ođđa girjjiid birra.
Sáhtát eanet lohkat dás:
https://www.uis.no/sites/default/files/inline-images/yQwinMDgIOhoCXTO3vGLu6Hb04I20nil93sGY3PRfhxavqqPJM.pdf
https://www.thereader.org.uk/wp-content/uploads/2024/09/The-Readers-Work-with-Children-Young-People.pdf