Ovtta- ja guovttegielat ságastallanstrategiijat
Vaikke mánát bajásšaddet máŋggagielat birrasis, de ii leat daddjon ahte sii álget hupmat daid gielaid mat geavahuvvojit iežaset birrasis. Danin fertet mii rávisolbmot láhčit ovttagielat birrasiid vai mánát sámástišgohtet. Ságastallamat sáhttet doaibmat ovttagielat sámegielat birrasiin, jus mii rávisolbmot leat dihtomielalaččat das makkár ságastallanstrategiijaid válljet geavahit go humadit mánáiguin.
Ovttagielat ságastallanstrategiijat váikkuhit dasa ahte sihke mánná ja rávisolmmoš ságastallaba ovtta gillii, sámegillii. Guovttegielat ságastallanstrategiijat váikkuhit dasa ahte ságastallan manná guovtti gillii, ovdamearka dihte sámegillii ja dárogillii (Pasanen ja earát 2022:29).
Dábálaččat lea rávisolmmoš guhte váikkuha dasa makkár gillii ságastallá dahje humada. Jus rávisolmmoš sámásta, de son hukse vuordámuša ahte ságastallan galgá leat sámegillii. Sáhttá dáhpáhuvvat ahte mánná vástida dárogilli, vaikke rávisolmmoš sámásta. Dát dáhpáhuvvá dávjjimusat jus mánná ii hálddaš sámegiela nu bures. Dakkár dilálašvuođain galgá heivehit ságastallama mánnái ja máná giellamáhttui. Ovdamearkka dihte, jus mánná ii hálddaš sámegiela, de ii galggašii čađat sámástit ja geavahit mun in ipmir -strategiija. Mii šaddat heivehit ságastallangiela sihke mánnái ja dilálašvuhtii (Pasanen ja earát 2022:29.).
Gáldu:
Pasanen, Annika ja earát 2022: Gievrras giellamodeallat. Sámediggi.
Mikkelsen, Inga Lill Sigga: Samtalestrategier – en effektiv metode for å styre barns språkbruk. Ovdanbuktin mii ii leat almmolaš.