Filbma: Bearraša rolla máná sámegielovdáneamis

Giellaoahpahus lea oktasaš bargun olles máná lagasbirrasii ja servodahkii. Váhnemiid rolla dán barggus lea earenoamáš dehálaš, go sii leat mánáid vuosttáš giellamodeallat. Miehta sámi leat mánát geain leat iešguđetge vuolggasajit sámegiela dáfus. Deháleamos lea ahte mánát besset gullat ja geavahit sámegiela nu olu go vejolaš, ja ahte buohkat máná birrasis dorjot, movttiidahttet ja sámástit ieža. Jus váhnemat eai hálddaš ja máhte sámegiela, de lea dehálaš movttiidahttit sin sámástit dan mađe go máhttet. Sáhttá evttohit ahte sii sáhttet ovttas mánáin oahppagoahtit sámegiela. Dáinna lágiin čájehit mánáide ahte sámegielas lea árvu ja stáhtus.

Dán filmmas muitaleaba Annika Pasanen ja Ánne-Márge Päiviö makkár rolla bearrašis lea máná sámegielovdáneamis. Annika Pasanen lea sámegiel sosiolingvistihka professor Sámi allaskuvllas ja Ánne-Márge Päiviö lea mánáidgárdeoahpaheaddji ja vuosttáškonsuleanta Sámi allaskuvllas. 
 

Jus filbmii ihtet guokte teavstta badjalaga, de deaddil "CC- hide captions" boalu.