Lohkanmokta

Lohkangelbbolašvuohta lea okta eavttuin birget máilmmis. Lohkan ii leat dáidu, dat lea juoga man ferte oahppat ja dan ferte hárjehallat. Buriin ja valjit hárjehallamiin šaddá njuovžilis lohkki, mii addá nana vuođu birget buorebut sihke skuvllas ja maŋŋel bargoeallimis ja muđui eallimis birget.  

Danne lea dehálaš árrat hárjehit mánáid geahčadit ja liikot girjjiid ja guldalit go lohká girjji. Mánát leat sáhkkit ja jearahit sihke govaid birra ja bustávaid ja sániid, ahte mii die lea bustávaid ja mii die čuožžu? Mánná ferte beassat vásihit ahte lohkan lea somá ja ávkkálaš. Danne lea dehálaš ahte lohkkojuvvo juohke beaivvi ja ahte lohkan lea lunddolaš oassi beaivválaš doaimmain. Sisdoallu girjjiin  galgá lea buot mánáid beroštumiid mielde.  

Lohkanbottus sáhttá álggos geahčadit olggoža. Makkár govva lea girjeolggožis? Man birra jáhkkibehtet ahte dát girji lea? Boktit sáhkkiivuođa girjji sisdoalu ektui ovdalgo lohkagoahtá lea hui dehálaš. Go lohká, de sáhttá maid suorpmain čuovvut teavstta vai mánát oidnet gokko álgá lohkat ja guđe guvlui lohká ja maid vai mánát oidnet čállojuvvon teavstta seammás go gullet dan.

Lea vejolaš lohkat ovtta dahje moadde siiddu hávális ja de bisánastet ja ságastallat sisdoalu birra. Mii geavai? Gean birra lea? Gos lea dát muitalus? Ledje go amas sánit? Maid jáhkkibehtet ahte de geavvá? Rávisolmmoš berre dovdat girjjiid sisdoalu ovdal lohkagoahtá. Berre maid bidjat fuomášumi bustávaide. Leatgo oahpes bustávat? Jus leat olu govat girjjis de sáhttá hupmat govaid birra, omd.  mii oidno govain, masa dat adno? Jus doppe leat juoga mii álgái  m-jienain, de muitala dan ja de čájehit M bustáva. Gávdnet go mánát eanet m-sániid govain? Árvádala ovttas mánáiguin mii son de geavvá viidáset, omd. jáhkát go ahte geavvá ná vai nuo?