Mánát geain ii leat dábálaš giellaovdáneapmi ja geat eai oahpa giela nu go vurdojuvvo sin agi ektui, sis soitet leat giellaváttut.
Dán páhkas oahpásmuvat giela iešguđet beliide ja guorahallat makkár giellaváttisvuođat gávdnojit. Mii geahččat giellaváttisvuođaid mihtilmas dovdomearkkaid, ja ovdanbuktit muhtin kártareaidduid. Árra áŋgiruššan erenoamáš doaimmaiguin ja buorre giellabiras leat fáktorat mat váikkuhit eastadit giellaváttisvuođaid, ja dasto váikkuha dat maiddái lohkan- ja čállinmáhttui ohppiin geain leat gielalaš hástalusat.
Doabačielggadeapmi:
Developmental language disorder (DLD) lea namahus mii adno go mánát rahčet gielain, ja váttut eai leat čadnon eará sivaide. Sámegillii jorgaluvvo Giellaváttut mat gusket ovdáneapmái. Ovdal adnui namahus Spesifihkka giellaváddu. Dál leat guođđán dien namahusa ja dan sadjái leat máilmmiviidosaččat atnigoahtán DLD namahusa.
Sáhtát dárogillii lohkat eambbo terminologiijarievdama birra dán artihkkalis.