Nannenmodealla-doaba muitala ahte giellabarggu ja giellaoahpahusa ulbmil lea nannet sámegielat oahppi sámegiela ja ovddidit dan viidáseappot nu ahte oahppá lunddolaččat iešguđet áššiid birra ságastallat, lohkat ja čállit sámegillii. Ulbmil lea ahte ohppiin lea produktiivvalaš sámegiella.
Go čuovvu nannenmodealla, dalle lea sámegiella oahpahus- ja gulahallangiellan skuvllas ja ruovttus. Dainna lágiin gullá oahppi giela ollu, ja oažžu máŋggabealat fáttáin sátneráju ja oahppá movt iešguđet áššit ovdanbuktojuvvojit gielalaččat. Skuvllas dát mearkkaša ahte sámegiella lea oahpahusgiella buot dahje ollu fágain.
Nannenmodeallas lea deaŧalaš, lassin dasa ahte geavaha sámegiela buotlágan dilálašvuođain, maiddái bargat systemáhtalaččat ja diđolaččat giellaoahppamiin.
Gielladutki Colin Baker gohčoda dan modealla maintenance / heritage language, ja professor emeritus Jon Todal fas bevarings- og utviklingsmodellen. (SáMos raporta 2022).
Eambbo lohkat?
Pasanen, Annika & earát (2022): Gievrras giellamodeallat. Sámediggi