Kultur- ja dásseárvodepartemeantta ovttas Máhttodepartemeanttain leat bidjan johtui lohkanmoktastrategiija Leselyststrategien 2024-2030 man ulbmilin lea nannet lohkanmovtta ja lohkangelbbolašvuođa buot ohppiin Norggas. Dáinna strategiijain áigot hukset nanu lohkankultuvrra, oažžut valjit girjjiid olámuddui mánáide ja nuoraide, vuoruhit ja nannet skuvlagirjerádjosiid, ja nannet girjjálašvuođa gaskkusteami, vai mánát ja nuorat ožžot girjjálašvuođa mii movttiidahttá ja addá miela lohkat. Áigumuššan lea maid vuoruhit deaddiluvvon oahppogirjjiid skuvllaide.Tid for lesing nammasaš nationála vuoruheami ulbmilin lea nannet lohkanoahpahusa Norgga skuvllain.
Dákkár strategiija lea dárbbašlaš go mii diehtit ahte mii oahppat, ipmirdit ja birget buorebut servodagas ja demokratiijas go máhttit bures lohkat. Mii oaidnit čálalaš teavsttaid sihke skuvllas, barggus ja friddjaáiggis. Dán áigge ii olmmoš birge jus ii máhte lohkat. Lohkama bokte mii beassat vásihit eará áiggi ja báikki. Mii lohkat fearániid mat guoimmuhit, riggudahttet dahje hástalit. Lohkama bokte mii beassat čiekŋudit fáttáide main mii beroštit ja maid birra háliidit oahppat eanet. Jus galgat ipmirdit buot čállojuvvon teavsttaid, de mii fertet hálddašit lohkama.
Lohkama ferte vuoruhit
Mii fertet vuoruhit ahte min oahppit galget lohkat, vaikke ii leat dat maid álo háliidit. Muhtomin lea áibbas ortnegis vuoruhit eará go lohkanoahpahusa, muhto ii beare dávjá. Jus mii eat vuorut lohkama ja lohkanoahpahusa, de min oahppit eai oahpa lohkat. Juohke gillii lohkan lea buorre, go dat nanne sámegiela lohkama maiddái. De olmmoš hárjána dovdat bustávaid, automatiseret sátnelohkama ja hárjeha lohkankondišuvnna (lohkansávrivuođa). Muhto, vaikke lea áibbas ortnegis muhtomin fállat girjjiid eará gillii, de fertet aŋkke hárjehallat ja oahppat lohkat sámegielgirjjiid maid, vai dan álget hálddašit.