Lohkat govaid
Go mánát geahčadit govvagirjjiid, de sii dávjá fuomášit govain eará go rávisolbmot. Mánát fuomášit detáljaid maidda rávisolmmoš ii soaite bidjat fuomášumi. Divtte mánáid muitalit maid sii oidnet ja doalat dahje joatkke sága dan birra. Jeara ovdamearka dihte maid sii oidnet govas, mii dáhpáhuvvá ja makkár govva mánáid mielas lea. Leago somás, ilgadis dahje váivves govva. Sáhttá maid jearrat áibbas konkrehta jearaldagaid, ovdamearka dihte makkár mielas mánná govas orro leame, maid son dat jurddaša jna.
Govain soitet maid leat áđat/oasit maid mánát eai dovdda ovdalaččas, dahje doppe dáhpáhuvvá juoga mii ii leat oahpes dáhpáhus mánáide. Dalle lea vuogas muitalit sániiguin dán birra, vai mánát ohppet ođđa sániid ja daidda gullevaš dadjanvuogi ja sojaheami. Lea maid dehálaš iešguđet lágan surggiid girjjiid válljet vai nanne giellariggodaga iešguđet fáttáin.