Mii lea erohus muitalusain ja máidnasiin?
Muitalusaid dovdomearkkat
Muitalusa álggahus lea dávjá ná: “ De lei oktii okta...” Lohkki bálkestuvvo muitalusa sisa oanehis čilgehusain váldoolbmo birra gii galgá birgehallat iešguđetlágan hástalusaiguin. Muitalusat eai leat čadnon dihto báikái. Muitalusain leat dávjá magihkalaš ja badjellunddolaš sivdnádusat. Lea sáŋgár gii birge buot hástalusaiguin mat čuožžilit. Muitalusain leat geardduheamit ja magihkalaš logut leat 3,7 ja 12. Dat vuhttojit muitalusain golbma hástalusa bokte, golbma ártegis sivdnádusa nugo golmmaoaivvat stálu bokte , čieža heitot jagi bokte ja nu ain. Muitalusain lea alo morála dahje juoga diehtu guldaleaddjái dahje lohkkái mas lohkki oahppá juoidá. Lea meastta alo lihkolaš loahppa, mii ovddida guldaleaddjái dahje lohkkái ahte buorrevuohta vuoitá alo heitoha badjel.
Máidnasiid dovdomearkkat
Máidnasat leat maiddái badjellunddolaš sivdnádusaid ja dáhpáhusaid birra. Dat čilgejit luonddu birra, manne lea nu go lea. Ja dat čilgejit maiddái elliid birra manne leat nu go leat. Máidnasiin leat elliin olmmošlaš dáiddut nu ahte ovdamearkka dihte hupmet ja meannudit dego olbmot. Leat čadnojuvvon dihto báikkiide ja olbmuide. Máidnasat leat oanehaččat ja lea ovtta ášši dahje dáhpáhusa birra. Dain maiddái sáhttá leat morála.
Máinnasfuođđut
Fuođđut maiguin deaivvadit muitalusain ja máidnasiin sáhttet leat earret eará stállu, ulda, čáhcerávga, jiehtanas, eahpáraš ja stállu. Dasto leat eallit ja lottit nu go guovža, rieban, njoammil, buoidda, garjá dahje skire ja nu ain. Buot fuođđuin leat iežaset iešvuođat mat leat biddjon sin duohta luonddu dahje hámi geažil.