Nannenmodealla-doaba muitala ahte giellabarggu ja giellaoahpahusa ulbmil lea nannet sámegielat mánáid sámegiela, ja ovddidit dan viidáseappot nu ahte oahppá lunddolaččat iešguđet áššiid birra ságastallat sámegillii. Ulbmil lea ahte mánáin lea produktiivvalaš sámegiella.
Go čuovvu nannenmodealla, dalle lea sámegiella oahpahus- ja gulahallangiellan mánáidgárddis ja ruovttus. Dainna lágiin gullá mánná giela ollu, ja oažžu máŋggabealat fáttáin sátneráju ja oahppá movt iešguđet áššit ovdanbuktojuvvojit gielalaččat.
Suoma beal Sámis leat nannenmodeallain olahan buriid bohtosiid. Doppe sii leat huksen sámegielat birrasa ja leat bidjan olu fuomášumi diđolaš giellageavaheapmai. Sii leat dihtomielalaččat bargan nu ahte sámegiella lea váldogiella mánáidgárddis, eaige geavat suomagiela veahkkegiellan.
Nannenmodeallas lea deaŧalaš geavahit sámegiela buotlágan dilálašvuođain, ja bargat systemáhtalaččat ja diđolaččat giellaoahppamiin.
Dá lea modealla, man Baker gohčoda maintenance / heritage language modeallan, ja Todal fas bevarings- og utviklingsmodellen.
Eambbo lohkat?
Pasanen, Annika & earát (2022): Gievrras giellamodeallat. Sámediggi
Govva: Gunnlaug Ballovarre