Mánáidgárddi rámmaplána geadnegáhtta ahte mánáidgárddis galget aktiivvalaččat bargat mánáid giellaovdáneamen. Danin fertejit mánáidgárddi bargit diehtit mii nanne mánáid sámegiela. Sámegielovdáneami dáfus lea buoremus jus giellabiras lea ovttagielat olles áiggi. Jus dat ii leat vejolaš, de sáhttá láhčit saji oasseáigásaš ovttagielat birrasii. Daid birra beasát eanet lohkat earet eará čihččet páhkas: Tilegnelsesmodellen (Oamastanmodealla). Danin lea hui dehálaš mánáidgárddis kártet giellabirrasa ja gielladili go galgá bargat sámegielovdánemiin.
Dán barggu oktavuođas berre čielggadit makkár sávaldagat mánáidgárddis leat ruovttuide ja maiddai olles mánáidgárdái. Mánáidgárddis galggašii leat ulbmilat giellabargui, maid vuođul bargá vai joksá giellaulbmiliid. Daid ulbmiliid birra galgá ságastallat sihke mánáidgárddis ja ruovttuiguin.
Dalle soaitá vuogas jurddašit daid áššiid birra:
- Movt lea sámegiela dilli min bargosajis ja min lagasservodagas?
- Makkár galggašii bargiid gielladilli leat?
- Movt mii geavahit sámegiela árgabeaidilis iežamet mánáidgárddis?
- Makkár giellaplánat, giellaprinsihpat ja bargovuogit leat mis odne?