Mii lea lohkankvárta?
Lohkankvárta lea lohkandoaibma maid ávžžuhit čađahit beaivválaččat skuvllas. Dan doaimmas oahppit ieža lohket girjji maid leat válljen. Oahppit galget lohkat birrasat 15 minuvtta juohke iđida, ja dat šaddá de din iđitrutiidnan. Ávžžuhuvvo maid ahte oahpaheaddji lohka girjji dan kvártta, iige bargga eará doaimmaid. Oahpaheaddji lea lohkanovdagovvan, ja go oahppit oidnet ahte maiddai oahpaheaddji lohka, de dat sáhttá movttiidahttet ohppiid lohkat iežaset girjji.
Govva: Árvu
Dat ii leat guorahallojuvvon galle skuvlla ja galle luohkkáceahki álggahit skuvlabeaivvi lohkankvárttain, muhto dat leat oallugat geat barget dan. Danin leatge maid olu vásáhusat čadnon lohkankvártii. Oallugat sis oaivvildit ahte lohkankvárta lea hui buorre vuohki álggahit beaivvi, dat boktá lohkanmovtta ja ovddida ohppiid lohkandáiddu. Go álgá lohkankvárttain, de sáhttet vuos oahppit leat stáđuheamit, muhto vásáhusaid vuođul de eanas oahppit hárjanit lohkankvártii. Danin fertejit leat čielga rámmat ja njuolggadusat das maid lohkankvárttas galgá bargat ja maid ii. Ovdamearka dihte de sáhttá ovdagihti humádit ahte go lea lohkankvárta, de galgá leat lohkanráfi.
Dutkamat čájehit ahte olbmo lohkančehppodat boahtá das man dávjá ja viššalit olmmoš lohka. Suomabeale dutkit leat vel lassin gávnnahan ahte lea hui buorre dávjá lohkat guhkibuš teavsttaid, go dat ovddida ohppiid lohkanmáhtu ja konsentrašuvnna máhtu. Dainna lágiin sáhttá ákkastallat ahte lohkankvárta lea hui dehálaš ja ávkkálaš vuohki álggahit juohke áidna skuvlabeaivvi. Lohkankvárta sáhttá nu šaddat rutiidnan, ja eanas mánát liikojit rutiinnaide. Rutiinnaid geažil mii diehtit mii galgá dáhpáhuvvat goas, ja dat buktá oadjebasvuođa skuvlaárgabeaivái.
Geahča áinnas Lesesenteret webinára lohkankvártta birra (dárogillii):
https://www.uis.no/nb/nasjonalt-lesesenter/forskning/webinar-lesekvart
Plakáhtta (dárogillii):
https://www.uis.no/sites/default/files/2025-04/Lesekvarten-Leseplakat-2025.pdf