Mat leat árvalusteavsttat?

Árvalusat leat guhká leamašan áiggegollun ja adnon pedagogalaš reaidun sámiid gaskkas. Árvalusat leat oanehis čállosat mat govvidit dahje čilgejit dihto olbmo, ealli, dávvira, diŋgga dahje fenomena.  
Go bargá árvalusteavsttaiguin, de oahppi hárjehallá lohkat teavsttaid mat leat čállojuvvon mun-geahčestagas. Dása lea buorre hárjánit, go olu čáppagirjjálašvuohta lea čállon mun-geahčestagas.  

Dáinna bargovugiin beasat ovttas ohppiiguin stoahkat gielain, ja dán lea hui álki heivehit ovttaskas oahppái. Álgooahpahusas sáhttá oahpaheaddji lohkat árvalusteavstta olles luohkkái, ja oahpaheaddji ja oahppit ovttas ságastallet ja geahččalit gávdnat vástádusa. Go veahá stuorrulit, de sáhttá oahpaheaddji lohkat álggos ovtta árvalusteavstta ovttas ohppiiguin, ja dasto sáhttet oahppit iešheanalaččat lohkat eará árvalusteavsttaid. Boarrásit oahppit sáhttet ieža čállit ja ráhkadit árvalusteavsttaid, maid dasto skuvlaoappát ja skuvlavieljat besset geahččalit čoavdit.