Blabb-lohkanhárjehusat

Dábálaččat oahppit galget lohkat teavsttaid vai beassat gávnnahit ja oahppat eanet muhtin dihto ášši dahje fáttá birra. Dalle leat dávjá ráhkaduvvon bargobihtát maid oahppi galgá vástidit. Go bargobihtáide galgá gávdnat vástádusaid, de sáhttá oahppi dušše jođánit ohccát čoavddasáni teavsttas, iige dárbbaš álo lohkat olles teavstta.  

Muhto, Blabb-lohkanhárjehusat leat ráhkaduvvon nu ahte oahppi ferte dárkilit ja vuđolaččat lohkat olles teavstta vai fuobmá mii Blabb lea. 

Blabb-lohkanhárjehusat leat oanehis teavsttat main okta sátni lea váldon eret, ja dán sáni sajis adno Blabb-sátni. Teavsttas čilgejuvvo Blabb, ovdamearka dihte olgguldas hápmi, masa adno, gos gávdno dahje eallá ja gii dan atná. Logadettiin sáhttá oahppi álggus teavsttas juo álgit árvidit ja govvidit mii Blabb lea, muhto ferte lohkat olles teavstta vuđolaččat jus galgá gávnnahit mii dat Blabb duođai lea. Ulbmil dain lohkanhárjehusain lea boktit ohppiid sáhkkiivuođa ja dárkkistit ahte oahppi lohka vuđolaččat olles teavstta.