Ságastallanstrategiijat bargosajis
Mis lea buohkain iežamet vuohki gulahallat earáiguin, sihke mánáiguin ja rávesolbmuiguin. Min hupmanmálle báidná min bargogiela. Dan dihte lea dehálaš ovttas iežas mielbargiiguin ságastallat dan birra vai mis lea oktasaš ipmárdus movt gulahallat bargobáikkis.
Dávjá lea nu ahte dat giella mainna don leat oahpásnuvvan olbmuin čuovvu dudno oktavuođa. Das oaivvilduvvo ahte jus leat oahpásnuvvan soapmásiin dalle go son dušše dárustii, de lea bahá suinna ain dárustit vaikke dieđát ahte son lea oahppan sámegiela. Sáhttá maid nu ahte din bargobáikkis leat bargit geat leat aiddo sámástišgoahtán. Sin lea hui dehálaš movttiidahttit sámástit, ja lea hui dehálaš ahte singuin sámásta.
Skuvllain gos leat máŋga sámegiela sáhttá leat hástalus sámástit. Dákkár dilálašvuođain dii fertebehtet ovdagihtii mearridit ja čielggadit guđe vugiin dii gulahallabehtet.
- Movt dii din skuvllas čoavdibehtet dákkár hástalusa?
- Leago dis dihto báiki gos beassá dárustit?
- Lávebehtetgo neavvut guhtet guoimmádet giellageavaheami dáfus?
- Movt ja goas lea vuogas neavvut?